Бұйырмаса, бұйырмасын бақ-дәулет –

Анам барда айтылатын жыр-ән көп.

Анам барда бақыттымын, асқақпын,

Анам барда асқақ тұтас бір әулет.

Аман болсын "Ана" деген бар адам,

Бұдан өзге мен Алладан сұраман!

Бұйырмаса, бұйырмасын хан сарай –

Жарым барда үзілмеген үмітім.

Жарым барда жазылады жыр талай,

Жарым барда қажырлымын, күштімін.

Алла қуат берсін бізге, ағайын,

Әйелдердің қамдайтұғын күтімін!

Бұйырмаса, бұйырмасын қазына –

Қарындасым бір қызығы өмірдің.

Тағдырыма болсын қандай базына,

Ол жан барда гүлдеп тұрса көңілім?!

Шаттығыңа құрбан болсын шыбын жан,

Қарындасым, сая тапқын қасымнан!

Дүние жарық көкте нұрлы күнімен,

Дүние – ләззат қыздарымның үнімен.

Қос қызығым шуақ берер жаныма,

Бірін артық көре алмадым бірінен.

Әр шаңырақ толы болсын сәбиге,

Күлкісімен көңілдерді тербеген!